Mimi nipo katika dhana ya mja wangu kwangu, na Mimi nipo naye wakati anaponitaja

Hadithi hii ni katika yale anayoyapokea Mtume rehema na amani ziwe juu yake kutoka kwa Mola wake, na huitwa Hadithil Qudsi, au Hadithil ilaahi, nayo ni ile ambayo matamshi yake na maana yake inatoka kwa Mwenyezi Mungu, isipokuwa haina mambo maalumu kama ya Qur'ani ambayo inajitofautisha na maneno mengine, kama kisomo chake kutumika kama ibada, na kujitwaharisha kwa ajili yake, na kutoa changamoto, na maswala ya kisayansi na mengineyo.

Amesema Al-Ajurri: Hakika wanaofuata haki humsifu Mwenyezi Mungu Mtukufu kwa yale aliyojisifu kwayo Mtukufu, na kwa yale aliyomsifu kwayo mtume wake rehema na amani ziwe juu yake, na kwa yale waliyomsifu kwayo Maswahaba radhi za Allah ziwe juu yao, na huu ndio msimamo wa wanachuoni katika wale waliofuata muongozo na wala hawakuzua. Mwisho. Wanaofuata Sunna (Ahlus Sunna) wanamthibitishia Mwenyezi Mungu yale aliyoyathibitisha yeye mwenyewe juu ya nafsi yake miongoni mwa majina na sifa, pasina kupotosha wala kukanusha, wala kuuliza namna yake, wala kupiga mfano, na wanamkanushia Mwenyezi Mungu yale aliyoyakanusha yeye mwenyewe juu ya nafsi yake, na wananyamaza katika yale ambayo haukuja uthibitisho wala kanusho, amesema Mwenyezi Mungu Mtukufu: "Hakuna chochote mfano wake, naye ni msikivu Mwenye kuona".

Kumdhania Allah vizuri ni lazima kuambatane na matendo, amesema Al-Hassan Al-Basari: Hakika muumini alimdhania vizuri Mola wake hivyo akafanya matendo mazuri, na hakika muovu alimdhania vibaya Mola wake kwa hivyo akafanya matendo maovu.

Amesema Qurtubi: Inasemekana kuwa: Maana ya "Dhana ya mja wangu kwangu" ni dhana ya kujibiwa wakati wa kuomba dua, na dhana ya kukubaliwa wakati wa kuomba toba, na dhana ya kusamehewa wakati wa kuomba msamaha, na dhana ya kulipwa wakati wa kufanya ibada kwa sharti zake kwa kushikamana na ahadi za kweli, na ndio mana ni lazima kwa kila mtu ajitahidi kuyasimamia yale aliyo na yakini nayo kuwa hakika Mwenyezi Mungu atamkubalia na atamsamehe; kwa sababu yeye mwenyewe aliahidi hivyo na yeye haendi kinyume na ahadi, akiitakidi au kudhani kuwa Mwenyezi Mungu hatomkubalia nakuwa hayo hayatomnufaisha, huku ndiko kukata tamaa na rehema za Mwenyezi Mungu ambako ni katika madhambi makubwa, na atakayekufa katika hali hiyo atawakilishwa katika kile alichodhania kama ilivyokuja katika baadhi ya riwaya za hadithi iliyotajwa, "Basi mja wangu na anidhanie mimi akatavyo" anasema: Na ama dhana ya kusamehewa ikiwa ni pamoja na mtu kuendelea na madhambi huo ndio ujinga halisi na ni kujidanganya.

Himizo la kumtaja Mwenyezi Mungu ndani ya nafsi yako na kwa ulimi wako vyote kwa pamoja, yaani mtu ndani ya nafsi yake na moyo wake amuogope Mwenyezi Mungu na akumbuke utukufu wake na haki zake na awe na matarajio kwake na amtukuze na ampende na amdhanie vizuri na amtakasie matendo, na atamke kwa ulimi: Sub-haanallaah (Ametakasika Mwenyezi Mungu) Al-hamdulillaah (Kila sifa njema zinamstahiki Mwenyezi Mungu, na Laa ilaaha illa llaah (Hapana mola apasaye kuabudiwa kwa haki isipokuwa Mwenyezi Mungu), Allaahu Akbaru (Mwenyezi Mungu Mkubwa), Laa haulaa walaa quwwata illaa billaah (Hapana ujanja wala nguvu isipokuwa kwa Mwenyezi Mungu).

Amesema bin Abii Hamza: Atakayemtaja akiwa na hofu basi atampa amani, au akiwa mpweke basi atamfariji.

Shibri: Ni urefu wa kuanzia kidole cha mwisho mpaka kidole gumba wakati wa kukunjua kiganja, na Dhiraa: Ni urefu wa kuanzia ncha yakidole cha kati mpaka katika mfupa wa kiwiko, na Baa'a: Ni urefu wa dhiraa mbili za mtu na muundi wake na upana wa kifua chake; ambayo ni kiasi cha Dhiraa nne.